Tag Archive: 足球

Jul 12

波終人散貓安樂

忙忙碌碌過了一個月,世界盃終於落幕了。今年完全無乜心想講波,皆因工作時間突變,連尾場都要在公司睇,加上天氣太熱了,懶懶懶,只想睇,唔想寫! 夏日炎炎,家中貓大人都是慵慵懶懶,晚上妻開冷氣還好一點,下午他們陪我吹風扇,熱到瞓地磚。唔知係唔係熱出病,阿哥屁股傷了,在屎眼的四點及八點方向流血,起初以為家裏有甚麼尖物弄傷了他,後來醫生話這是肛門腺發炎,醫生擠了一些油,替傷口消毒,再打一針,承惠441元,另有一個星期消炎藥。最初幾日阿哥還乖乖的食藥,後來卻掙扎,唔知是否動物的天性,知道已經好了,加上他屙爛屎(前所未有),見他傷口好得七七八八,於是便停藥。上網找資料,知道以後要定期清潔,即使好似醫生講,有些貓一生都唔會有事,但阿哥就要小心一點。 天氣熱,妻放縱的讓貓大人入房歎冷氣瞓,結果我收工時無貓等門,最多是阿哥坐在房門睨了一眼,回身入房繼續歎冷氣。放假早早上床瞓時,還被妻投訴、貓怒睥,話我瞓了阿妹瞓開個位,嗚嗚!明明張床我瞓,幾時變成咁無地位。

Jun 17

炎炎夏日睇波

進入世界盃後,兼工作時段大變,生活翻天覆地迥異於前,連家中兩隻貓都有點不慣──點解貓奴仲唔使返工,又或者點解日日差不多天光先蒲頭。一言以蔽之,難頂! 下午多咗時間在家,自然見到一些不常見的事,如貓瞓覺是會反肚的。上圖是貨真價實的反肚照,我不過是搬把風扇幫貓大人納涼而已。 貓奴今個月的生活,離不開電視與電腦,順手拈來,拍下了下面這兩張相,阿妹好似冇乜所謂,任我舞!

May 03

利記走樣

今年無乜講波,因為無乜好講,我的球季早在上年尾已完了。 昨晚利記對車仔,完全無睇頭,輸波都無感覺,我寧願車仔攞冠軍。反而今場那件波衫更有趣,特別是下季心口的贊助商會變成渣打銀行,這件中文波衫更見珍貴。唔知香港有冇得賣,又會唔會被炒起。 今年的成績,是近六季最差──差到失去歐聯的資格,如無意外在聯賽更是以第七名畢業,唉!好X差!身為利記死硬粉絲,常問今季發生乜嘢事搞成咁:主力長傷嗎?每隊波都要面對這個問題,非利記獨有。後備不夠好?無可否認這好重要,特別是現在搞波是燒錢的遊戲,看看曼城便是一個好例子,但是熱刺、維拉,甚至富咸的成功,又不似只是錢的問題。剩下的我覺得是教練出了問題。 賓尼迪斯的固執,已非新聞,上季他的固執在聖誕快車期間堅持要用羅比堅尼就可見一斑,若非一月失了那麼多分,又怎會以兩分被曼聯壓倒。今年的固執是在排陣選人上,點解要用雙防中,而且是兩個有破壞欠創造的防中呢?盧卡斯利華今年打得唔錯,攻守有板有眼,但他與馬斯查蘭奴一樣不是一個識策動反擊的防中,駁腳就得,又點識失波。我不是特別掛念沙比,一個時期有一個時期的排陣,若然無咁人腳就不應排咁陣,打少一個防中,出多個進攻中場不是更好嗎?又或者好似對馬體會那場,將謝四放回中場中,拍馬斯查蘭奴掃蕩校炮,將右路讓給另一翼鋒,進攻可以更流暢,派牌的人放在中路更易看透形勢。 今季買的人,真的不俗。古莊臣這個右閘助攻力強,但問題就是太多助攻,辛苦古積特多回防幫忙。希臘中堅基加高斯的頭鎚不俗,制空能力甚強,唯一是速度慢,若配一個有速度的拍檔,可補其不足。其實中堅位是問題最少的位置,最少有四個人選,反而左閘就煩,自己偏愛的懷斯走了,奧利理奧長期有傷,恩穌亞雖然不過不失,但還是令人不太放心。 沙比走後,阿古蘭尼的加盟自然成為焦點,可惜他是玻璃腳,又要適應英超踢法,自然不能與沙比相提並論,但觀乎季尾的表現,真的可以有所期待。至於季中才簽的麥斯洛迪古斯,直覺好似古積特,夠勤力,走足全場,而且是正宗翼鋒,出波更好。 費托曾說要買入四個有質素的球員,我當然舉腳贊成,他言下之意是有四個位置未夠班,我估第一個位置要買人是前鋒,這當然唔係費托唔夠班,而是他傷得太多,頂更的唔夠班,我指不是古積特,而是尼哥治。另一個位置要加人是左翼,本來尼亞拿真的幾好,但扭計已在晏菲路無將來,巴布更是阿斗,進步不多,班拿約好正,但唔夠氣,好難場場打,好易打柴。左閘都要換,奧利里奧不能依靠,左閘可選的不多,可以有更好的選擇。至於第四個位置位,應該是中場中,可以是防中,亦可以是MF,這要看排陣。 我心目中最佳的陣當然是4-3-3,我打機都是用這個陣,一個防中,左右進攻中場是阿古蘭尼/班拿約,及謝四,CF當然是費托.左右是巴布/尼亞拿,及古積特/麥斯洛迪古斯。現實當然是另一回事。 現實中,4-4-1-1應是最合適,雙防中是謝四拍馬斯查蘭奴,破壞與建設並重,左翼是班拿約/巴布,右邊是古積特/麥斯洛迪古斯,阿古蘭尼則在費托後面支援,亦可與謝四換位輪流進攻,令進攻更立體。講翻之前第四個要加人的位置,可能是阿古蘭尼及謝四的替補,始終一季咁多場波,唔偒都要休息嘛。 其實,最最最重要的是,快啲換老闆,這個空殼老闆早走早着。至於賓尼迪斯,固執唔係唔好,擇善固執就得,兼聽之後再固執會更好。不過,換換人亦未嘗不可,但千萬不要那些指手劃腳的名宿,他們吹水就得,要教波就有點令人擔心。

Nov 30

貓與足球

早前講到兩隻貓見到魚雙眼就發光,其實令他們發狂的還有足球──電視中的足球。 阿哥對Plasma的影象特別敏感,特別是閃動的東西,足球便是其中之一。發現這個情況是在打FIFA10時,阿哥明明睡眼惺忪,仍會興奮的撲上Plasma前,左摸摸、右撲撲,想不到自家的貓兒,竟會幫對手,因為阿哥遮了Plasma的下半截,所有攻勢要放在上半截螢幕,但對手卻沒有這個顧慮,於是我防守時就麻煩多多。 今晚看西班牙國家打吡,阿哥又發狂,撲上Plasma前追波兼追人,只求就手,不分敵我,皇馬巴塞球員照拍可也。巴塞贏波,合情合理,我覺得最大功臣不是人波的伊巴謙莫域,反而是隊長佩奧爾,其一夫當關的功力,不可小覷。 阿哥今晚追得很開心,我亦看得好過癮,不過妻就有點意見,特別是看到Plasma上的小腳印時,我反而有點擔心,唔知抓花了Plasma,保養包唔包呢?

Oct 26

吐一口烏氣

今日(正確一點是昨日)要開工,但有兩件事心掛掛,其中一件就夜晚場大戰。 開波前利記一致被睇淡,身為死硬派的我都打定輸數,不過心底都有一絲希望,上季首輪都是人腳不齊,又是被睇死,結果與今日一樣,是要班Pk仔收聲。 今季要爭標,雖說路遙遙,但睇怕比上季更大難度,板凳太淺是一大問題,無了費托謝老四,實力大打折扣。另外,中場走樣亦是一大漏洞,無了沙比,換來一個還未上場的阿古蘭利,希望他會好似FIFA 10中般好打。其實,歸根究柢還是要換老細,無錢就無謂搞波,換個中東王子唔係更好嗎! 唔知下次輪到利記作客,維迪會否再做紅牌阿姑,嘿嘿!

Apr 15

利記爭氣

四比四,利記歐聯畢業了。 首循環主場輸一比三,已經打定輸算,只希望利記爭氣,在史丹福橋打得好好睇睇。開波見到加歷查做隊長,即謝拉特傷了不能出,真是落筆打三更。怎知反而上半場打得真的好正,竟然入了兩球,以為真的有希望,豈料下半場12分鐘變為二比二,不但要由頭開始,還要輸凸。但波是圓的,利記竟然會連入兩粒,反超前四比三,以為還有希望,不過最後都被追平。 在謝拉特及託利斯缺陣(二比三時被換)下,都入到車仔四粒,我已經好滿意。惟有希望在聯賽不要失分,靜待曼聯出錯。 盧卡斯利華雖然有波入,但我始終認為他是第一個要賣走的球員,有他出場的賽事,好似都無乜好收場。買巴利,既可打防中,若謝拉特有傷,又可以打進攻中場,勝在百搭。若然可以買埋華倫的韋拿,將利記完全西班牙化亦不俗。 以為可以收到一份好大的生日禮物,唉!

Mar 14

LFC,勁!

這個星期真美妙,周中派了四隻蛋給皇馬,今日又拮紅魔四刀,哈哈哈! 贏皇馬有人會說是主場之利,但勁炒紅魔就有說服力了嘛!皇馬踢得真係差,中場無影無蹤,前鋒無供應自然無乜表現,而皇馬後防出名豆腐,對方攻力弱便唔多覺,但一遇到壓力問題就現形──中堅身位差轉身慢,左閘多錯漏,右閘有前無後,似鋒多個似衛,若非有個世界級鋼門,那晚點止輸四粒。當晚似西班牙內戰,兩邊都是國家隊門神,但一哥沒有無防掩護,結果慘遭蹂躪,相反國家隊大後備多得後防穩陣,整晚安然度過。 利記對皇馬的雄姿,今晚早期無乜,輸12碼前紅魔明顯佔優,謝老四踢到無形,最主要原因是無一個有腦的中場。利記現在打雙防中是最有效率的,馬斯查蘭奴搭沙比阿朗素就最好,一個破壞一個派牌,皇馬是被托利斯打倒及謝老四埋掉,但若沒有兩個防中高效率的表現,皇馬點會一粒都入唔到。今晚沙比傷了,只有馬斯查蘭奴,搭一個無乜信心的盧卡斯利華,破壞有餘,創意卻不足,結果前面兩個就踢得好沉,到輸了一個12碼就好鬼擔心。不過歷史是會重覆的,第一輸都是利記先失球,但最後勝利始終是利記,然而今晚比首輪贏得更早更多。利記打得最好當然是托利斯及謝老四,但盧卡斯今日都好稱職,對面嗰個乜雙料足球先生被嘜到無影,臨危受命的希比亞亦老而彌堅。不過,最要多謝的,當然是對面的維迪,無他點會有今晚的強姦。 一晚的勝利不代表有希望捧盃,利記餘下九場,還有幾場硬嘢,好似下場對維拉(第一輪好似是和波)及四月中對阿仙奴(第一輪都係和鬼咗),並於收鑼對熱刺(今季首場輸波),九場一分都不能失兼對面失分,才有機會問鼎冠軍,好被動。相反,紅魔還有十場,好似只有阿仙奴及維拉有骨,捧盃始終是大熱門。 利記今季對Big 4另外三隊,四勝一和,表現是近年最好,如果整季都有如此好表現,就不會落得如今被動的困境。盧卡斯若穩定一點,遲早可以上位。杜辛拿今周兩場都是由他埋齋,發覺他打翼好個打閘,不要再勉強打閘了。 賽前朗尼的惹火言論實在矚目,今晚之後,這個拖肥紅魔多一個理由「Hate」利記了。

Older posts «