屎坑大帝～～續集

大帝版圖擴張，洗手盆成為龍床。　　彭師奶攝

貓曆元年，屎坑大帝攜同御妹，紆尊降貴入住貓奴蝸居。

元年八月，邊城進入暑熱時份，貓大人開始識歎冷氣，反肚瞓更是常態。

普天之下，莫非貓土，率土之濱，莫非貓奴。貓奴大脾，固然是床，貓奴肚腩，更是好枕。蝸居寸土，貓毛為記，領域之內，任貓闖蕩。私有屎坑，據為己有；擴而佔之，首選面盆。夏日炎炎，清涼透身。貓奴洗手？奴才自理。

擱筆之前，多送一相，正襟阿哥，甚有貴氣。若戒多嘴，益顯可愛。

靚靚仔仔影靚相，這刻覺得阿哥對眼都好圓。

屎坑大帝

霸着屎坑不拉屎，無符！

自從天氣轉熱後，阿哥便開始這個霸屎坑的習慣。理論上，貓瞓的地方應該是最舒服的，但左睇右睇，屎坑有乜舒服？

馬桶被貓大人據為王座後，每次如廁，都要三催四請，請大人稍移玉步，屢次換來一副臭臉。不但如廁，沐浴刷牙，都要在貓大人監視之下進行。又唔係用佢哋啲嘢，有乜好睇喇？

從此之後，馬桶蓋必須闔上，否則八卦的貓必然抵不住誘惑去攪屎坑水，今日草缸換水時打開馬桶蓋時，阿哥便太八卦而失足跌入屎坑，嘩！好彩當時的水是乾淨的，唔係就多咗一隻屎坑貓了。

唔知係唔係貓有預知天性，好耐無試過下午時間阿哥會出廳瞓，現今我寫他糗事時，他竟睡在我腳上，好似提醒我小心下筆，呵呵呵～！

貓大人新玩具

我都唔知點形容，惟有講一句：阿妹真搞嘢。

愛貓的人，肯定知道Maru的大名，其捐紙盒的特技，紅透Youtube，那時邊看邊笑邊疑惑，是否每一隻貓都愛捐紙盒？

近日天氣酷熱，啤酒梳打水消耗極大，有出自然有入，於是紙盒多的是，隨手放兩三個在地，貓大人便多了新玩具，當中又以阿妹最雀躍，阿哥都鍾意玩，但唔能夠好似阿妹般捐入去，惟有望盒興歎。阿妹又怪怪的，一次捐過兩個盒便停下來，是否第三個對她太長呢？

要冧貓大人，不一定要花錢，下次表演我飲酒貓飲啤酒罐外水珠的特技，呵呵呵！

波終人散貓安樂

引頸翹望，目標只是燈上的小昆蟲。　　　彭師奶攝

忙忙碌碌過了一個月，世界盃終於落幕了。今年完全無乜心想講波，皆因工作時間突變，連尾場都要在公司睇，加上天氣太熱了，懶懶懶，只想睇，唔想寫！

夏日炎炎，家中貓大人都是慵慵懶懶，晚上妻開冷氣還好一點，下午他們陪我吹風扇，熱到瞓地磚。唔知係唔係熱出病，阿哥屁股傷了，在屎眼的四點及八點方向流血，起初以為家裏有甚麼尖物弄傷了他，後來醫生話這是肛門腺發炎，醫生擠了一些油，替傷口消毒，再打一針，承惠441元，另有一個星期消炎藥。最初幾日阿哥還乖乖的食藥，後來卻掙扎，唔知是否動物的天性，知道已經好了，加上他屙爛屎（前所未有），見他傷口好得七七八八，於是便停藥。上網找資料，知道以後要定期清潔，即使好似醫生講，有些貓一生都唔會有事，但阿哥就要小心一點。

天氣熱，妻放縱的讓貓大人入房歎冷氣瞓，結果我收工時無貓等門，最多是阿哥坐在房門睨了一眼，回身入房繼續歎冷氣。放假早早上床瞓時，還被妻投訴、貓怒睥，話我瞓了阿妹瞓開個位，嗚嗚！明明張床我瞓，幾時變成咁無地位。

炎炎夏日睇波

係阿妹自己反肚，貓奴冇做相呀！

進入世界盃後，兼工作時段大變，生活翻天覆地迥異於前，連家中兩隻貓都有點不慣──點解貓奴仲唔使返工，又或者點解日日差不多天光先蒲頭。一言以蔽之，難頂！

下午多咗時間在家，自然見到一些不常見的事，如貓瞓覺是會反肚的。上圖是貨真價實的反肚照，我不過是搬把風扇幫貓大人納涼而已。

貓奴今個月的生活，離不開電視與電腦，順手拈來，拍下了下面這兩張相，阿妹好似冇乜所謂，任我舞！

貓奴最常用的兩件東西，阿妹據為己有。

搵周公

夏日炎炎，肥貓好眠。

兩位貓大人，只要不是做破壞王，都是一個可愛精，特別是搵周公的時候。

羅列破壞王的戰績：四個半火牛（兩個室內無線電話、一個手提電話、一個電腦喇叭及半斷的路由器）、兩條電腦AV線、兩對電腦喇叭、一條中置喇叭線、一條DVD機光纖、amp的收音機天線，最新的犧牲者是兩張餐椅。而最尷尬一次是出了街才發覺條褲開了兩個窿，兩位破壞王可能擔心我熱壞，幫我開窿透透氣吧！

為此我甚勞氣，他倆亦受了不少皮肉苦，反而妻甚通達，笑稱他倆又自我增值。增值歸曾值，千萬唔好電死。

爪下亡魂~~激心上集

大人，請高抬貴手，睇住部Plasma。

上月尾有一篇〈貓與電線〉，今日這個〈爪下亡魂〉則是延續篇。

貓大人可能好似小朋友出牙一樣，極度牙癢，上次換了一對電腦喇叭，又有一隻的線壯烈犠牲了，因妻不習慣用Headphone，惟有再添新的，今次換了一個全新，不用2.1，裝好試用了個多鐘才上班，三個鐘後妻回家後報告，其中一隻喇叭連着斷線橫臥地上。那剎那手握電話筒，好想嘔血。好彩今次的喇叭是兩邊插線，只需花15元換條線，毋須整個喇叭換，都無咁肉痛。當朝收工回家，拿着個斷線喇叭，審問正睡在梳化上的兩位貓大人，阿哥扮傻了片刻，立即跳起遠遁，而阿妹繼續睡眼惺忪。有合理理由相信阿哥是元兇，阿妹最多是懵盛盛的幫兇。

最肉痛莫過於另一個爪下亡魂──Plasma，阿哥不知幾時開始會行掛在牆上的Plasma，行歸行，只要小心都無乜所謂，但衰就衰在他學藝不精。早兩日在我面前行Plasma Catwalk，被我一個獅吼功大喝，失手跌落地，他試圖掙扎，結果在Plasma的玻璃面留下兩條抓痕。

當貓爪在玻璃面抓出刺耳的聲音時，我心在淌血呀，情願被抓是我的大脾。

P.S.
最近還有一個重要犠牲者，就是向ET借來的Scanner，同ET自首時方知道是ET太座的，唉！要好認真處理，唔通好似ET笑笑口咁說要阿哥棚牙！

第一次沖涼

沖涼後，忙舐身，貓奴則忙於塗紅汞水。

上年十一月入門至今，兩位貓大人都無沖過涼，今日天氣好，陽光普照，唔使睇通勝都知是沖涼好日子。

早前同事Ｓ忠告，沖涼前要做好保護措施──自我保護措施，長衫長褲是必須的，浴簾買多套後備。這些忠告是有用的，浴簾無爛，而人的傷痕卻因長衫長褲而減到最少。

同貓沖涼的證據。

大大隻的阿哥，起初都有掙扎，但可能認命便讓我抱着慢慢濕身，甚至半眯着眼，貌甚享受。結果是阿哥比阿妹濕得透身，亦比阿妹洗得乾淨。

至於貓奴，傷痕在所難免，手腳幾乎無傷，只是心口肚腩頸項有五六條傷痕，最犀利是眼角那一條，幾乎要做獨眼龍幾日。

又係阿妹

對唔住喇阿妹，今次係事頭婆影，你實在好搞嘢呀！

忍唔住又執多阿妹一劑，因為這張相實在好搞嘢。

相對而言，阿哥好似無咁多搞嘢相喎。

貓與電線

奀皮貓，四圍跳，四圍咬，風扇都難逃貓吻。

以前去家有貓狗的朋友家，都會遇到一個問題，就是貓狗會否咬電線。MO仔好聰明，除了一次推翻了部PS3外，對ET家中的模型電線都無乜破壞；M家的阿Q細個都有咬，但好聰明唔咬有電的。反觀家中兩位大帝，可能牙真的好癢，不少家具已慘遭毒手，當中又以電線災情最重。

電線有粗幼，他們鍾情幼線，可能咬得斷有成功感吧，又可能咬得斷我才發現，其他粗的電線都無放過，只不過咬不斷而已，但點點咬痕證明曾被他們寵幸。到目前為止，他們的戰績如下：室內無線電話叉電電線兩條、座枱燈電線一條、電腦喇叭電線一條、墊背枕頭一個、腳踏一角、貓玩具海綿波數個，及無數膠袋。家具有損耗早有心理準備，但咬爛電線就問題大，現在爛的都不是甚麼難搞昂貴的線，卅多元一個火牛、百多元一對喇叭都是容易更換的，若然是咬爛櫃背的線材，咁就肉赤兼麻煩，條線已經貴，要重新拉線駁線才是噩夢。

望住條斷了的電線，教貓便成了當務之急，而我的方法極粗暴，特別是發現電腦喇叭線斷了時，阿妹還用斷線作挑牙狀，結果被我按在地上，望着斷了旳喇叭線，先用獅吼功勁鬧，狂彈耳十多次，打天靈蓋多下，再翻轉按着頭，望住我摑面十多下。那一晚，阿妹遠遠的避開我，以後我大聲喝他們，兩隻嘢立即搵地匿。

妻有一次見到我粗暴教貓，大感心痛，不過當兩隻貓黐我唔黐佢時，又酸溜溜的怨隻貓點解唔記得我打得佢哋咁甘。嘿嘿！貓是知道誰是Boss的。