踩去深涌

深涌最出名的草坪,雖做不成高爾夫球場,仍保養得好靚!

早前看到妻的車友介紹深涌,上網找資料,方知道是一個熱門的單車路線之一(上google用「深涌 單車」找一找就知道有幾熱門),於是趁今日上午有空檔去一轉,探一探路。

沙田入馬鞍山到泥涌,之前去西沙茶座食下午茶已踩過,不乜問題,問題是西沙路。之前已經想踩西沙路,但一個人上西沙路,始終有啲驚,路窄車不少,即使是閒日早上,車來車往,惟有偷雞踩上行人路,好彩無俾人捉,行人路亦無乜人,路面狀況亦不太差,無乜食轆的地方,從泥涌到水浪窩,雖有暗斜,只用了20分鐘,比我估計的少。若是行山經水浪窩去馬鞍山,便是從這裏出發,西沙路旁有個公廁,好好認。

公廁旁有條路落榕樹澳,順着條大斜路落好快見到一個閘位,閘後是集水區,按法例是不准踩單車,又再學人偷雞踩入去。這條路好好踩,偶爾有對頭車,企嶺下海灣盡收眼簾,約20分鐘便到榕樹澳。若唔想踩這一段路,應該可以打的,但我估無乜人唔會唔踩這段乜靚風景乜舒服的路吧!入榕樹澳前有一個幾靚的公廁,過橋後有一個茶寮及打野戰的場,之後靠左轉,過了一排無乜僭建的村屋,留意指示,不太難搵去深涌的路。

入深涌的路鋪了石屎,雖然窄了一點,但慢慢踩都不難應付。途中不少路段都是在海邊,間中有些上斜,不要只顧睇風景唔睇路。踩啊踩,若見到深涌碼頭,即代表深涌已不遠了。過了碼頭,轉一個彎便豁然開朗,三兩間舊村屋在一大片草坪後,沒有遊人如我般閒,靜悄悄的,只有剷草聲。出發前找資料,知通在深涌有地方開餐,不過一個只開周五、六及日,另一間則周中無休,但我去到卻發現兩間都無開,而唯一一戶有人的,卻不是正式做生意,幸好這個兼職士多有水賣,橫豎都食唔落,飲水只足夠。從榕樹澳到深涌,約需30分鐘。

回夠氣便原路撤,上西沙路前的大斜路,認真攞命。回馬鞍山時,不再踩行人路,而是直接踩車路,貪回程多落斜,踩行人路無乜暢快。踩車路當然危險一點,但勝在夠爽夠快,毋須20分鐘便回到泥涌。之後踩返火炭才是戲肉,烈日當空,真懷疑自己會中暑,所以中午12點幾時真的不宜在路上。

看深涌的資料,曾經幾乎變成高爾夫球場。有大地產商已買下不少地,而且已進行了初期工程,後來遭反對,政府亦重新規劃,並在上年12月核准大綱草圖,估計高球場計劃應該夭折,但這並不代表發展商會死心。與當地人閒聊,知道他們受聘於發產商,公司規定草坪的草要定期剪短,由左到右,剛好一個循環,日日要剷草無停手,除了用人手剷外,還有兩部剷草機幫手。雖然高球場開唔成,可能改變計劃開Spa水療度假中心,唔知真定假了,值得跟進留意。

入深涌必須經西沙路,而西沙路逢星期日及公眾假期是不准單車進入,所以要在閒日或周六方可在陸路入,又或者駕車在水浪窩附近泊好才踩入榕樹澳深涌。另一個選擇是搭在馬料水往塔門的街渡去深涌,閒日只得兩班,六、日及公眾假期則有三班。若果夾得好,星期六可以早點踩入深涌,玩一輪食埋得Lunch(周六深涌農莊有開),然後搭1430的船回馬料水,還有氣有力的話,就去石湖墟食紅豆冰,或河上鄉食放題豆花。

諗係無用,身體力行吧,不過首先要在星期六放假,整個七月只有一個周六放假,唉!

下面是今日的路線圖,詳情可按此。

題外話:
今日看到這單新聞,方知西貢另一個靚地被入侵,其實政府上年9月已刊憲規範白腊的發展,不知今次會否是另一個大浪灣的翻版?

Leave a Reply

Your email address will not be published.

This site uses Akismet to reduce spam. Learn how your comment data is processed.