功虧一簣之二

過完年後,終於有一個休孖Day兼好天氣,不二話,踩單車長征去,目標是100公里。

今次晨咁早,只是瞓了兩個幾鐘,八點半多便出車,以大圍作起點,九點○七分開始,入大美督到鹿頸出沙頭角公路,兜上流水響路經龍山寺松嶺鄧公祠,出番粉嶺到上水,在石湖墟廣成食午飯,這時只是十二時,一切都在預算之內。

食完飯十二時半再出發,先去河上鄉,睇下豆漿廠門市開了沒有,然後還是走舊路,經麒麟山坳新田軍營牛瀾尾軍營到上水,今次想爭取時間,無入南生圍,直接經工業邨入濕地公園後的魚塘,兩點半到尖鼻嘴,兩點九到流浮山,到這一刻都好順利。

按計劃,之後是入上白泥下白泥,希望可以繞過垃圾堆填區去龍鼓灘發電廠,然後經屯門碼頭入市中心,搭西鐵返歸。問題就出在這裏,上下白泥都算順風順水,昨日煙霞不大,后海灣風光不過不失,去到下白泥的分岔口,走錯路去了下白泥村,順便買支水補給,見到有村巴來往元朗。當時不以為然,繼續上路,去到堆填區前見到三架Mountain Bike從青山腹地下來,知道入不到堆填區,與之前在上白見到兩個車友講的一樣。其實出發前找資料,已有兩手準備,知通可以上青山腹地,落屯門山景邨,見三個單車友從山上來,於是實行Plan B,怎知我錯了,錯得好緊要!

這段山路,雖叫青山腹地,實際是軍隊練靶場,亦是一大塊劣地。山坡只有灌木草叢,黃泥外露,路上滿是碎石,斜坡更是1:4,踩上唔夠力,踩落唔夠膽,於是全程推車,踩車無端端加插行山已辛苦,仲要行一個好爛的山兼推住架單車,一路推一路罵自己蠢,忘記同事J的意見,去到下白泥叫車,又或者搭村巴出元朗,結果要在山頭行了個幾鐘,有一段路更是危險得很,根本不宜推單車。

最最激氣的是,原來今次還未達標,只有96.3公里,只是差少少,嘔血!其實認真一點,尾段在山上是推的,所以不算踩,七除八扣,可能只有八十多公里。我估如果有入南生圍,數字上是夠一百公里的,但不是踩足全程,這又有乜意義。我諗下次踩出荃灣,睇怕一定達標喇!

2 comments

    • Giff on May 11, 2011 at 12:03 pm

    師兄你太利害啦!可否給我詳細路線呢?好想依你路線踩一轉呢!先謝謝!

    • Greg on May 18, 2011 at 2:35 am
      Author

    過獎!過獎!

    其實這條路線是由幾條熱門線路合併而成。第一段是大美督至鹿頸,好易搵,單車徑去到大美督,過咗食肆就踩馬路,上落斜時小心謹慎,若是假日上路,應會有好多車友同路。過咗鹿頸又是一條路,到沙頭角公路睇你自己點選,踩行人路會好啲。至於兜唔兜去流水響路,悉隨尊便,因為最終都會出番粉嶺。

    至於上水到元朗,就是走麒麟山坳、新田軍營等路,若未走過,又無人帶,搵路有點難,惟有放大一點地圖找一找吧!

    上水到流浮山段,最難找的是如何入濕地公園背後的漁塘,你可以善用google street view看看大約位置,我每次出發前都是這樣找路的,有些路無標示的,只是不可行車,不等如不可行單車,請留意。

    至於流浮山至白泥段,正如上文所講,要有租車的準備,極不推薦上青山過屯門,極極難走。

    如果你需要,我可以將GPS Logger的檔案傳給你,讓你可以在google earth上開,應該可以睇得更仔細。

    希望可以幫到你。祝

      踩車萬事小心

Leave a Reply

Your email address will not be published.

This site uses Akismet to reduce spam. Learn how your comment data is processed.