碧峰峽熊貓基地

慵懶的熊貓仔,據樹為王。

上月有四日假,偷閒上了成都,趁機去了碧峰峽,碧峰峽有乜睇?當然唔係遊山玩水,只是為了四隻腳的大熊貓。

香港海洋公園四隻熊貓都是來自臥龍,正確一點是,臥龍是全球最重要的熊貓研究中心,可惜的是,在08年512大地震中破壞嚴重,當然還有一隻大熊貓在地震中罹難,經研究後,認為在原址核桃坪重建不可行,於是搬家往雅安碧峰峽。

去碧峰峽熊貓基地(正式名稱:中國保護大熊貓研究中心雅安碧峰峽基地),相對臥龍是方便的,毋須去茶店子客運站,車程亦毋須四個多鐘。在新南門上車,準七時半開車,車資45元,車程約兩個半小時,終點是雅安汽車站,這是一個極簡陋的站頭,去碧峰峽的車是停在旅遊汽車站‎外,這兩個站相距約10分鐘路程,不是太難找,出發前上Google Map找資料看一看,應該不會迷路。往碧峰峰的車是貨Van,應是坐10人的,當然超載是毫不意外。車資5元,車程約20多分鐘,推薦坐左邊靠窗位置,因為上山路的風景全在左邊。行行重行行,落車後便見到碧峰峽的售票處。

嚴格的說,碧峰峽本是是一個4A級的景區,與以前臥龍不同,熊貓基地只是碧峰峽景區一部分,所以買入場券時一定要講清楚,如果只是去熊貓基地,只需118元,這已包景區內的所謂環保車車費。環保車普普通通的疏落,途中有幾個站,但熊貓基地是大站,永無落錯。

參觀熊貓基地有一大疑問,就是基地有食飯時間(12:00至13:30)。計一計車程:成都07:30出發,約09:30到雅安,雅安往碧峰峽的車10:00開,10:20到售票處,等景區的環保車,約10:40開車,10:50到基地正門。如果食飯時間謝絕參觀,咁就大鑊了,難道千里迢迢來到熊貓基地,只是看得一個鐘就要走?好彩,職員話無話硬性規定要清場,這段食飯時間園內的穿梭巴會停駛、無職員看舖而已,當然要低調低調,不要太喧嘩,如果嘈到拆天,緊俾人趕。嘿嘿嘿!無職員看檔,咁即係可以爬入去攬熊貓?

相對臥龍,碧峰峽的地方較大,分為三大區:白熊坪、熊貓幼兒園及豹子山,另有熊貓繁殖場,但謝絕參觀。所以不要吝嗇10元,幫襯基地內的穿梭車,無謂浪費時間在行路上,我就是一個反面教材,好彩毋須被趕出去,否則就揼心。三大區以熊貓仔這一部分最精采,因為十多隻熊貓仔放在一起,試問全世界哪一個地方可如此奢靡?雖然參觀時大部分熊貓仔都是搵周公,但精靈活潑的熊貓仔是可遇不可求。睇熊貓不要懶,多走幾步,在熊貓幼兒園後有一條石階,要看清楚看多幾隻熊貓就要請移玉步。

睇完熊貓仔,當然要睇大熊貓,遺憾的是太部分熊貓都午休,只是睇到三、四隻大熊貓,其中一隻更是元龍高臥,瞓到肚腩向天,這正是七月Blog頂的開Blog相。幸好老天爺可憐我,叫其中一隻熊貓大人表演爬樹──是四、五層樓的樹啊,爬上爬落,身手敏捷,超感動。

碧峰峽基地地方夠大,所以比臥龍識做生意,至少有兩個舖頭賣紀念品,但好嘢不多,且欠缺基地特色,這始終較成都熊貓基地遜色。若然嫌從成都來匆匆忙忙,可以住碧峰峽大門,因為售票處本身是酒店招待處,價錢貴不貴、房間好不好,不知道。

左磨右磨,磨到下午一時一刻才離開,雖然不是睇到好多熊貓,但至少沒有遺憾。當年在臥龍,一念之差不留多一日做義工,以為以後還有機會,怎知四個月後一場大地震將臥龍送進歷史。在碧峰峽見到十多名洋青年,換上制服做義工,真令人羡慕。若我的子侄輩話要去做義工,我必舉腳支持、出錢出力玉成,但哪個會好似我咁大癮?

29 comments

Skip to comment form

    • Bon Bonn on July 20, 2010 at 4:27 pm

    Dear 版主, 好多謝您既分享. 本人一直都有個想法, 就係一定要到四川熊貓保育基地做義工, 仲想起碼逗留一個月, 但家人反對我現上四川. 因為我喜愛既四歲半熊貓”泰山”仔從美國華盛頓DC運返左去上址. 現在無晒他消息. 請問您有無跟他見到面呢?? 佢好似住係二號別墅啊… 我真係好掛住佢呢..

    • Greg on July 21, 2010 at 2:01 am
      Author

    泰山呀!見唔到喎!其實當日見得太少熊貓──熊貓又點會嫌多。
    點解反對上四川?擔心地震?天災難料,放輕鬆。做一個月義工,聽到都流口水,當日我都見到好多鬼仔鬼妹做義工,現址比臥龍方便了很多,可以同家人一齊上去,讓他們放心。

    • Bon Bonn on July 21, 2010 at 12:21 pm

    好多謝您既建議, 但老媽子強烈反對, 睇嚟為左心愛既熊貓, 都要反叛她一次. 希望日後有機會同各人分享有關熊貓既樂事…很期待呢.

    • Greg on July 21, 2010 at 3:52 pm
      Author

    呵呵,鍾意熊貓唔駛反叛,最高深的反叛方法是誘惑阿媽都鍾意熊貓嘛!四川好多嘢玩,自己去都方便,玩完九寨,順道近近地玩埋成都熊貓基地,等阿媽知道成都是一個好鬼城市的大城市,咁你去雅安就唔會咁大反對喇!

    • Bon Bonn on July 21, 2010 at 4:23 pm

    哈哈,果然係一條好橋. 現在泰國清邁有隻在當地出生既一歲多少少女熊貓寶寶叫”Lin Ping”都好可愛架, 我日日都會透過life cam去探佢. 你有時間都去睇下佢呀, 她好鬼馬精令架. 我朋友剛剛到書展話我知見到熊貓書同dvd, 我好快又有精神食量啦. 如果佢見到太多熊貓書佢賣唔晒, 我唸都一定要抽時間去行下啦. 我試過訂日本既熊貓書,相片影得好靚,但唔識睇日文始終差d.

    • naan on July 22, 2010 at 2:45 am

    看到你張熊貓相,使我想起陳巧文。樹王。

    Bon Bonn,四川好多嘢玩,誘惑阿媽去成都,自己去

    熊貓基地。

    • Greg on July 22, 2010 at 5:03 am
      Author

    Bon Bonn,
    剛找到這條新聞,你必定好有興趣。
    留意相中背景,這就是碧峰峽熊貓基地。

    • Greg on July 22, 2010 at 5:18 am
      Author

    嘿!陳巧文點及得上熊貓仔咁可愛,係都揀周澄喇,有氣質好多。

    • Bon Bonn on July 22, 2010 at 9:15 am

    Grey, 真係好多謝您. 見到泰山既近況咁好,又咁多人愛錫,不其然兩眼通紅, 好感動!! 希望係當地既哥哥姐姐一路咁鍚佢. 其實泰山從細到大已經好聰明同聽話架, 見到佢既keeper就成日”料”人玩, 佢一開心就係咁翻筋斗..

    Naan, 多謝您既建議. 泰山都喜歡爬樹架, 下次您唸起樹王不如想起泰山仲好啦, 點睇熊貓都可愛過佢地啦.

    • Bon Bonn on August 13, 2010 at 4:45 pm

    Hi Greg, 好開心講你知我已成功說服老媽比我去四川探泰山仔同埋希望可以逗留一星期做義工(如果即場可以申請到)..但對於一個從未到過大陸既人,首要就係要攞張回鄉咭先,之後就係要睇熟你既行程溫馨提示貼士..若果一切順利既話, 九月頭就起行(最想弟弟肯陪我去,始終對少出門既我有d驚)..去到幫熊貓寶寶拾糞都願意…Pandas are so incredibly adorable!! Just looking at them will make you happy…

    • Greg on August 14, 2010 at 4:26 am
      Author

    嘩!恭喜恭喜!可以做一個禮拜義工咁發達呀?義工應該可以即場申請,不過以車程計,第一日去到熊貓基地都近11時,不如熟習環境吧!
    我有幾個忠告:
    1.帶夠盤川。上去旅行在在要錢,做義工是要貼錢的,例如租制服等;
    2.帶夠衫。碧峰峽海拔較高,加上是山區,早晚一定會較涼快(或者叫凍,因人而異),九月上山,多一件衫好過少一件;
    3.考慮做三至四日義工。
    4.帶部傻瓜相機跟身。可以隨時影snapshot,分分鐘或者有機會同熊貓影親密照。
    真的好羡慕,幫我偷「舊」熊貓屎,好嗎?

    P.S.
    你有冇問題,不論成都住宿或交通等,即管問我,我知道的必定答你。

    • Bon Bonn on August 16, 2010 at 12:27 pm

    Hi Greg, 好多謝您既忠告, 我會緊記. 如遇到住宿或交通問題一定會再請教你. 如果偷到兩”舊”寶寶屎, 定同你送分享..

    • RC on November 9, 2010 at 2:17 pm

    hi Greg,
    do we need to provide body check cert. before being volunteer??
    thanks for sharing.

    • Greg on November 9, 2010 at 3:37 pm
      Author

    我估唔駛喇,見啲鬼仔么妹都似是即場報名。
    唔好以為啲熊貓好嬌生慣養,可能比你和我還烏糟。

    • danny on November 9, 2010 at 10:12 pm

    我同我個朋友諗住黎緊上去做熊貓義工呀,但係真係唔知有咩要準備,義工真的可以即時報名嗎??同埋你會見意我地住係入面間酒店嗎??

    • danny on November 10, 2010 at 10:09 am

    hi greg~
    我想問下你有冇由成都去雅安 再去碧峰峽既車既資料呀
    例如- 幾耐一班車? 服務時間由幾時到幾時等等..
    因為我同我個fd 已經plan 我地一個星期既義工旅程la
    Many thanks~~

    • Greg on November 10, 2010 at 3:00 pm
      Author

    我手頭上無資料,僅憑記憶,在南門旅遊集散地的巴士站出發,早至七點都有巴士去雅安,我估來往成都及雅安的巴士甚密。至於由雅安駁車去碧峰峽更簡單,那些貨van式巴士,近乎坐滿即開,大不了幾個人一齊坐的士亦不會太花錢,好方便。

    • Greg on November 10, 2010 at 3:13 pm
      Author

    兩條問題都無辦法答你,因為我都無試過。
    以當日所見,有個鬼妹是即場報名,以前有朋友留言可以網上報名,唔知有無詳細資料。
    酒店方面,碧峰峽點都比臥龍好一點,至少景區入間酒店睇落好啲。至少熊貓基地外那間茶館有無得住就真係唔知。你去完講比我知好唔好。
    另外,切記多穿衣服,碧峰峽在深山中,一定好凍,不要冷親,否則唔俾親近大熊貓就大鑊了。

    • danny on November 10, 2010 at 4:27 pm

    感謝你的答覆~~
    剛剛問了其他朋友, 熊貓義工最好早d報名,而且做埋身體檢查先去好d,因為即場報的話,佢地未必會俾你好接近d熊貓,最多都係掃d 糞/ 劈竹~~
    如果有其他朋友有e方便既資料..可唔可以分享下~~thx

    • Mei on December 5, 2010 at 1:12 pm

    hi~~我都plan梗去做熊貓義工~不過下年先有假~~ =v=
    danny,,,唔知你出發左未?仲需唔需要資料? (我都係上網搵,唔係搵到好多..)

    http://www.pandaclub.cn/view.jsp?tipid=1167875644965
    哩個網址有詳細資料, 可以download到報名表同健康申報表~ 我問過o個邊d人話報名表填好可以email俾佢地(最少一周前提交申請), 健康申報表佢話可以到時先俾佢地~ 不過照你朋友咁講…可能早d email埋健康申報表俾佢地好d???

    另外網上有人講過:::

    交通
    1. 成都→雅安
    可以在新南門汽運站(旅遊集散中心)或是羊石汽運站到雅安,班車都很多(新南門車費44元)
    雖然在新南門名義上是直接坐到碧峰峽,可是我們在雅安市區就被趕下來了,車掌小姐退我們一人5元,自己再搭車上碧峰峽 >”<
    2. 雅安→碧峰峽
    從雅安旅遊車站搭俗稱"小菜蟲”的麵包車上山,班次很多,要注意班車方向是往上裏還是碧峰峽(車費5元)
    3. 碧峰峽遊客中心→熊貓基地
    小菜蟲會把乘客放在碧峰峽遊客中心,先到遊客中心買了基地的門票(30元)就可以免費坐接駁車,遊客中心離熊貓基地有一段不小的距離,非常不建議自己拖著行李走路去基地。


    1. 景區內:
    建議可以住在小西天,離基地非常近,每天睡到8:00再衝出房間都來的及
    (小西天-園林小居,電話:+86-835-2281500)
    雖然房間的條件不是很好,但是很乾淨
    訂房的時候可以和老闆説是基地的義工,有折扣(淡季,雙人房50/天)
    為一的缺點是沒有吹風機和熱水壺,如果要和熊貓長期抗戰,要自己帶吹風機和電湯匙
    2. 雅安市區:
    雅安市區的居住條件好一點,可以搭基地的交通車出/入碧峰峽,但是6點就要出門搭車嚕!!!


    做義工需要自己吃自己,可以在小西天吃
    不便宜、不好吃、但是也不特別難吃
    早餐可以自己帶乾糧

    到了基地然後咧
    1. 確定手上已經有熊貓基地的門票
    第一天到基地是要付門票的,第二天之後才能憑義工證自由進出,但是基地門口不賣票,一定要確定已經買到票了!
    2. 到大熊貓俱樂部簽切結書。
    大熊貓俱樂部在一入口處右邊白色建築第一間辦公室
    3. 拿著切結書去熊貓基地旅遊服務中心交錢和拿衣服,旅遊服務中心在熊貓幼兒園那裏
    辦完手續之後就會可以拜師學藝照顧熊貓去啦!

    希望你旅程順利~~!! 返黎同我地分享下丫~~~我都好想快d去呀!!! :]

    • Beschwa on December 9, 2010 at 5:07 pm

    我有事前報名做義工, 而且有提供身體檢查報告, 所以並沒有問題。不過我同行既朋友就到達時才報名而且沒有身體檢查報告, 最初他們並不願意接受申請, 不過講多2句就接受了, 工作性質一樣。 穩陣起見, 都係做齊所有手續啦。

    • Mei on December 12, 2010 at 11:08 am

    wa~~原來都好多人去過 :D
    係la~我都係穩陣d~ firm左個日子就報名先~~~咁身體檢查報告係咪真係到時先俾佢地都得? 我其實填好了~醫生就咁填哂”Normal/Not applicable”~~係咪ok?
    你o個陣住邊間酒店/旅舍?
    thx:]

    • Beschwa on December 13, 2010 at 4:09 pm

    (1) 身體檢查報告到時俾佢地睇就得ga la,不過我事前已經將報告email 左比佢地,另外份form 醫生填晒正常就ok。
    (2) 我是住小西天的, 環境真係麻麻, 因為我是冬天去的, 而沖涼個水壓是非常的細, 差不多冷死, 所以最好唔好冬天去。 而熱水壺可以去餐廳攞, 而且房間是沒有吹風機, 最好自己帶。
    (3) 碧峰峽門票可以上網預定, 有拆扣, 到時去到就可以領取門票而不用排隊買飛, 因為上次到達時有好多人排隊買飛。

    • Mei on December 15, 2010 at 8:23 pm

    哦哦哦~~~~
    係啦~都見到有人話小西天好差….不過好近~哈
    我打算3月去….應該都幾凍…冇熱水真係幾麻煩…o係大陸病左都唔知點算….所以我諗梗雨城區既酒店呀~有2間好似幾好~~佢地話30-40分鐘的士就到碧峰峽啦~~~都ok~最多早d起身~~好過病左冇得同熊貓玩~
    碧峰峽門票係咪上返碧峰峽個網訂? 第一日使唔使早d去報到?
    你o個陣有冇去附近玩? 我想去基地幾日之後去睇下風景~四姑娘山,卡薩湖o個d好似好難去咁….
    真係唔該哂你呀~ 好多問題 =v= “”””
    仲有唔該哂版主~!!!! 霸左你咁多位o黎留言問問題:p

    • Greg on December 16, 2010 at 3:22 am
      Author

    呵呵。歡迎大家在這裏多交換資訊,我都有得益喎。
    30-40分鐘車程,是一段好遠的距離,似乎不是一個太好的選擇。
    去四姑娘山行山,幾好玩呀!應該有公司可包團,連挑夫導遊,行幾日山,感受吓山巒靈氣,不俗。

    • Beschwa on December 21, 2010 at 10:55 am

    坐旅遊巴只可以去到碧峰峽正門, 正門是售票處, 之後要再轉車入基地, 去到基地門口都要行20分鐘去報到, 所以不建議住市區。 而且每天一早要去到做義工既地方。

    不過正門售票處好似有間酒店, 可以上網check check!!
    當天去到, 在正門等左好耐先買到飛, 買完飛又等左好耐先上到接駁車, 去到基地又要行一大段路去報到, 咁就攬左大半日, 所以當天冇得做義工, 不過真係睇係好唔好彩, 我個日去超多遊客。

    門票係碧峰峽個網訂

    我只係去左成都市中心行下, 同埋去左成都熊貓基地。

    • Mei on December 26, 2010 at 8:09 pm

    多謝你地ar~~~~~~~
    不過我得3月個假可以搵到人同我一齊去呢….所以都想搵間有熱水ge地方住~碧峰峽個網都有話有酒店可以預定….但我又search唔到資料….
    冬天好似要8點半報到…..如果住市區應該要7點就搭車nei~

    • Mei on February 6, 2011 at 3:49 am

    Beschwa,
    請問你o個陣係咪搵私家醫生填張body check form? 方唔方便講?
    因為我自己搵入職body check既醫生填埋, d朋友唔知出面搵醫生填使唔使驗哩樣驗o個樣收好貴….定係到時去到四川求其搵間醫院都填到?
    thx~~~ :]

    • Sofia on March 4, 2014 at 5:12 pm

    請問可以去邊度做身體檢查?大概幾錢?有冇比較平的選擇架?THANKS!!!

Leave a Reply

Your email address will not be published.

This site uses Akismet to reduce spam. Learn how your comment data is processed.