彳 山 亍 水

如此「乾淨」的網絡，舉世無雙。

去西藏，記得帶Notebook。如果你是搭火車，55個鐘無電腦又怎可消磨。如果你是龍友，有電腦可以幫你存相，兼可做早前工夫。如果你是個網精，一日不能不上網，你就即管帶Notebook去西藏，因為至少在拉薩上網都不是問題，而且多是免費。

出發前都估唔到拉薩的WiFi咁方便，住在第一間的青年旅舍，房間雖無WiFi，但其頂樓餐廳及五樓的茶室都有免費WiFi供應，頂樓餐廳的食物水俗不過不失，而且夠大碟，一邊食飯，一邊睇住布達拉宮，一邊上網，一樂也。此外，市內有不少餐廳都有免費WiFi，如Pazu的風轉咖啡，及一間名為驢窩的餐廳，只要你幫襯，幾乎可以任你坐。老實講，無可能全日出動去逛街，既然要搵地方Hea，不如搵可以免費上網的地方打躉。

上得網自然會看看mail，睇睇新聞，BBC去得到，有點意外，《蘋果》無試，無謂嘥時間，反而估唔到睇唔到《明報》，咁鬼正經無乜立場的報紙都「河蟹」了，唔通三月份特別與別不同。

這兩個月，在Great Fire Wall內的網絡新聞，一個接一個，最精采是谷歌南遷。這新聞可以純屬商業，不過事件中的主角太敏感，指控亦太嚴重，實在不難以純商業來評論。內地喝狼奶大的人將事件聯繫上治外法權，又似乎太上綱上線，做生意要守當地法律，理所當然，問題是這些法律是否合理，若然是利潤放中間，道義當然可以放兩旁，現今Google另有選擇，損失的是生機勃勃的神州市場，得到的似乎是更多的尊重。然而，Google將來會否為錢屈膝，難料呀！

在這件事中，另一個被談論得最多，就是被譽為Google在大陸最主要競爭對手百度（好似太俾面Google喎，百度贏咁多），其頭頭李彥宏在百度i貼吧上如此說：百度應該進軍香港嗎？粗略看過四、五頁跟貼，普遍讚好，原因卻是民粹得很。即使好似當中有人說，何必要「追殺」Google，但我覺得百度來香港，將如它在日本一樣，因為香港用家自由慣了，毋須別人教乜嘢睇得、乜嘢唔睇得。地域不同，民情有異，內地成功的，在彈丸之地不見得會開花。

以神州事事關心、件件過問的標準，蕞爾小島上的網絡仿如無掩雞籠。神州才俊當然獨具慧眼，在早前於深圳IT峰會上輸誠，認為監管是有必要的，當中的出位言論更是矚目。管得多是好嗎？放長雙眼看吧！上世紀的Iron Curtain都穿窿，相信歷史會有驚人的重覆！