阿妹要帶頭罩，阿哥似是安慰，似是八卦。
是日阿哥阿妹六個月零三日，亦是開刀去勢的大日子。
上次到SPCA寄宿時，已安排了做手術的日子，剛好忽然有雙休日，可以留在家中睇住兩位貓大人，伺候在側。
今早瞓了兩個鐘便去灣仔SPCA，平時還可以搭火車轉巴士，今日要用兩個袋，兼碰上上班繁忙時間，惟有打的，怎知隧道塞車，結果比以往更花時間。兩位貓大人在途中特別鼓譟，叫個不停，特別阿哥，一鋪蠻力，竟將貓袋的拉鏈頂爛逃出來，那個貓袋是新的，卻如此不濟。怕咗大隻阿哥，考慮再換個硬盒，以便重蹈今早在的士的尷尬。
阿哥可能有幽閉恐怖症，即使逃出袋後仍叫個不停，還掙脫我抱，不受控的四處走，從後座兩旁的玻璃，到車尾玻璃都爬上去，我隱約見到後面個的士佬有點突然，又有點笑意，我就一臉尷尬，擔心我個的士佬唔鍾意，怎知他一開口就話佢都有養貓，仲係兩隻㖭，然後有點沾沾自喜（我主觀認為）報上兩隻貓是長毛波斯及摺耳。一講貓經，自然有不絕的話題，剛巧遇上塞車，傾到落車時可以免收貓大人的車錢，誇張！
去到SPCA，因為遲到，我排第六，之後還有一個，即一個早上做七個手術。十時見完醫生，留下兩位貓大人，下午四時接回，中間六個鐘就在灣仔消磨。手術後，阿哥精神不俗，還是力大無窮，試圖逃「袋」。阿妹靜得多，始終女仔的手術大啲（收費亦貴啲），回家出袋時還暈暈哋似醉酒，加上帶了頭罩，碰碰撞撞很不習慣。
到了晚上，情況逐漸正常，衰阿哥毋須帶頭罩，如常清潔，更自舔傷口。最衰的是掂阿妹的傷口，好彩阿妹反抗兇阿哥，加上貓奴密切監視，暫時還未出亂子。但貓奴始終要搵周公、要搵食，點算？
4 comments
貝 says:
March 24, 2010 at 10:14 pm (UTC 8)
咁快去勢?你唔係話等佢地個頭大d先咩?:o
Greg says:
March 25, 2010 at 1:00 pm (UTC 8)
我都想等多下，但近期兩位貓大人的行為怪怪地，所以唔敢再等，春天到了嘛！
PCCW says:
March 25, 2010 at 5:06 pm (UTC 8)
你有無見過捉流浪喵去勢的義工，佢地的膠籠仲要加膠索帶的！
拉鏈袋………我家小妹得三四磅都可以沖出來！
TO GREG……….
如果係囡囡就唔好等，叫春先閹，仲危險！
叫春真係好大聲的！
Greg says:
March 25, 2010 at 5:15 pm (UTC 8)
PCCW,
我就是Greg，Greg就是我。阿哥現在3.8KG，下次唔敢用拉鏈袋了。阿妹已閹，不過手術後好似比較倦，阿哥就無事發生咁。