福榮街「家姐」

我哋唔係好熟喎!你知唔知個醜字點寫呀?

我哋唔係好熟喎!你知唔知個醜字點寫呀?

上圖就是福榮街「家姐」。

早前AL介紹,方知道在深水埗黃金後面的福榮街那麼有趣,加上《蘋果》的真假長毛的推薦,再加上要到元洲街買草缸光管,於是去認真逛一逛。而「家姐」便是其中一個舖頭的貓。

話說我入到那個舖頭時,「家姐」正忙於舐毛清潔,我不過是伸手摸一摸,怎知「家姐」老實不客氣,放下身段,順勢瞓低兼反肚。這剎那第一個感覺是「我哋唔係好熟喎」,但有貓送上大肚腩俾我抽水,當然不客氣。「家姐」也似是被摸慣,竟然將左手搭在我手上,慌死我摸摸下走鬼咗去,還會在適當時轉下位,似叫我轉下摸的位置。四圍的顧客嘩嘩聲,講「家姐」咪起隻眼鬼咁舒服,嘿嘿!我覺得好似讚緊我手勢好。

福榮街上除了有貓摸外,還有嘢食有嘢睇有嘢買。講到食,跟着上面《蘋果》的介紹去試都無乜錯。維記的豬膶麵真的好多人食,人多自然貨如輪轉,這代表豬膶好新鮮,而新鮮自然好食。好多人叫豬膶牛肉麵,好似好好味喎!至於咖央多及咖啡,可能是個人口味問題,普通合格囉。晚餐在劉森記解決,因為好想試蝦子撈麵,一言以蔽之,正!蝦子的量無搵你笨,我叫了個鵝腸,妻叫了個黑栢業,兩個都好新鮮,連跟撈麵的湯比其他舖頭的鮮甜,最搞嘢的是,腐乳通菜的腐乳經過加工,內裏加上蝦子,誇張!其實福榮街街頭的食肆都幾好,而且坐得更舒服,特別是黃金高登血拼後,值得一試。

至於福榮街有乜嘢睇乜嘢買,這就是玩具。以前灣仔春園街的玩具舖都好吸引,但近年覺得無咁吸引──值錢上的吸引力,而且只有兩、三間舖,少了一點,特別是拍落福榮街時更顯得稀疏。福榮街的玩具精品舖有做批發,所以全是大堆頭,好似一袋8個約三吋高的畢業熊仔,120蚊;一袋20個一吋高的公仔鎖匙扣,200蚊;一袋3個十二吋高的Mr. Bean熊仔,75蚊;還有大量文具,全是以一打打計,買得愈多愈抵!有一間舖是賣Thomas Train,一盒大大的480蚊,我估在玩具反斗城一定買唔到。只要你有耐性及腳骨力,一定可以搵到有趣的平嘢。

點解唔見旅發局向外國遊客推介這個有趣的地方?政府不停講甚麼地區經濟,以黃金高登為中心,加上福榮街及鴨寮街,深水埗一定可以消磨一日,唯一的缺點是烈日當空,真是蒙古大王打仔。

1 comment

    • 羊貓貓 on August 24, 2009 at 11:08 pm

    嘩!比你咁介紹法,我仲使去福榮街”蒲”,維記的豬膶麵羊咩龍冒死試過,佢食鮮牛肉麵都好味,至於咖央多的評價絕對讚同,好一般。如果比旅發局向外國遊客推介,我諗一定會走樣,到時大家又會小左一個好去處。

Leave a Reply

Your email address will not be published.

This site uses Akismet to reduce spam. Learn how your comment data is processed.