德黑蘭睇真啲

德黑蘭地標,背後是前朝好大喜功的代表作。

德黑蘭地標,背後是前朝好大喜功的代表作。

若要居高臨下,睇清楚德黑蘭,Azadi Tower是不二之選。去Azadi Tower最好搭的士,Metro都得,不過那一個站落都要行餐死,亦可以在Metro Line 2總站落車轉巴士,咁就係Azadi Tower旁落車,但問題是你唔知應搭哪輛巴士(牌無英文,點估)。Azadi Tower入場費算貴,但物有所值。場內導遊會先帶你睇地庫展館,不過爾爾,毋須浪費太多時間,之後另一個導遊接手,搭電梯上Tower頂。德黑蘭風光,若非污染犀利,應該可一覽無遺,不過現在還見到舊機場Mehrabad International Airport。除了可遠眺市內風光,Tower內亦另有乾坤,在塔頂有樓梯落樓,當日導遊趕收工,自然唔主張我地行樓梯,但一於少理,這才可以欣賞Azadi Tower的內在美。塔底層還有些展館,怱怱忙忙看得不真。

National Museum還有很大改進的空間。

National Museum還有很大改進的空間。

好多人,包括《Lonely Planet》都強烈推薦在展開伊朗遊之前,務必到National Museum一看。去National Museum很簡單,搭Metro在Hassanabad站落車,然後沿大街往東走,沿途商舖都是賣裝修工具,大約走五分鐘便到一個街口,見到指示牌轉左,目的地已在望了。博物館只有一層,內裏的展品集齊全伊朗的精華,但有一些是複製品。展品本身好精采,但博物館對每個展品的說明做得不夠詳細,而且館內氣溫高了一點,可能不怕那些石頭會爛嘛。

建築比展品更有睇頭的Glass Museum

建築比展品更有睇頭的Glass Museum

離開National Museum往北走七、八分鐘,便到了Glass & Ceramics Museum。館內的展品普普通通,反而此博物館本身的古老大屋更有睇頭,而館方在展覽方式上亦花了不少心思,有時間可以一看。看完博物館,可以到對面街一個麵包店買個餅食,好鬼好味。伊朗的麵包店真的值得幫襯,真材實料,嗜甜者更對胃口。

Bazar睇建築又得,睇人更精采。

Bazar睇建築又得,睇人更精采。

好多人會將Tehran Bazar及Golestan Palace一齊睇,兩者毗鄰,在Metro Panzdah-e Khordad站落就見到。要特別留意兩者開放時間,後者只開到下午三時,而前者與其他Bazar不同,是沒有午休時間,但亦在下午五時收舖,比其他Bazar早。後者因摸門釘,只能望門興嘆,至於Bazar當然不可放過。叫得Bazar必然夠大,例必迷途,錯有錯着,在外圍找到一檔賣牛雜的店舖,雖然羶味勁,但勝在熱騰騰。

巴士廣告精采,樓上櫥窗的婚紗更精采。

巴士廣告精采,樓上櫥窗的婚紗更精采。

其實逛Bazar比看其他景地更能睇清楚一個城市,或更仔細一點,重點是「逛」,地點不重要。所以我搏命行,竟然又逛到幾條有趣的街。好似離開Glass & Ceramics Museum往北走,在Jomhun-ye Eslami Ave轉左,便是手機AV器材集中地,手機舖成行成市,還有不少人在街邊兜售舊手機,而AV舖以賣HD LCD為主。到Valisar Ave交界時轉往北行,這條街(上圖)多是賣衫,偶爾見到一、兩間舖頭是賣性感內衣,遺憾的是全用厚布遮了門口,未能一窺全豹。若果繼續向前走,便會見到幾個電腦廣場,轉左沿Enqelab Ave往西走,則是一系列書店補習社,皆因德黑蘭大學已不遠了。

總括而言,要睇清楚一個城市,行多啲喇!

Azadi Tower門券:RL30000
National Museum門券:RL5000
Glass & Ceramics Museum門券:RL5000

Leave a Reply

Your email address will not be published.

This site uses Akismet to reduce spam. Learn how your comment data is processed.