我應該怎樣形容這隻碟？在唱片舖見到這隻碟時，即使是一點也不便宜，即使是舊歌（都離開這圈子了，又怎會有新歌），幾乎無乜考慮就買下了，全因為是陳潔儀。若陳美齡是年少時的偶像，陳潔儀則是一個經過選擇、值得欽佩的偶像。
這隻碟的賣點有二：一、音效好，LPCD喎，據介紹是以CD播出LP的效果，但家中的設備有冇咁勁先？你隻耳仔有冇咁靈先？二、歌夠多共17首，其中還收錄了兩首雪狼湖版（《祈求可以共你活一天》及《等了又等》）。揀歌方面，大致都滿意，如果可以飛了與蘇永康及林保怡合唱的兩首，補上《Mr. Tuner》及《約會》就完美了（還有好多選擇，不能盡錄，煩）。《心痛》有揀Unplugged Version值得一讚，我因《拔河》而認識陳潔儀，碟中亦有揀，好！雪狼湖版的《等了又等》唔係唔好，但我更鍾意她在新加坡演唱會中的版本，先是國語再來粵語，一次過享受兩種感覺，正！
之前講到一個藝人，若未能聲、色、藝兼備，至少要有其中之一，陳潔儀便是一個正面教材，三者兼得，奈何不再出碟。日前看到這個網誌，唔知是否陳潔儀自己開的，還是一個忠實粉絲開呢？據該卜的訊息，陳潔儀已轉行做PR，唔知他日有冇機會在工作上接觸呢？
最後，唯一一個希望，希望Kit Chan可以繼續出碟，形式可參考Susan Wong，貴精不貴多，既可控制質量，亦可一慰歌迷。
5 comments
soswebman says:
August 13, 2008 at 2:41 pm (UTC 8)
我都係冇考慮過既情況下就買左呢一隻碟，而且我仲係度搵緊佢既舊碟。
對於Kit 可以選擇自己喜歡的生活方式，可能比留下更有福氣。
Greg says:
August 14, 2008 at 2:41 am (UTC 8)
據講有一隻新的精選碟，唔知香港幾時才有得買？T_T
這隻LPCD，每日都會聽一遍，睇怕都要買多一隻作後備，否則他日聽到花咗就心痛。
soswebman says:
August 28, 2008 at 2:35 am (UTC 8)
有2隻新既精選碟，”再愛一回”同”私房歌”，
“私房歌”已經有得賣!
Greg says:
August 28, 2008 at 2:58 am (UTC 8)
但《私房歌》的包裝好似老翻，實在買唔落手！
soswebman says:
September 3, 2008 at 2:44 pm (UTC 8)
我而家搵緊”再愛一回”^_^