這個卜叫《彳山亍水》，但近來吹水多過行山，今日提起精神去上山。
今日煙霞頗勁，但勝在太陽不太猛，而且風又大（至少在西貢）。去了行麥理浩徑第一段，重點是浪茄灣。這段路十多年前曾經走過，當時爛得要命，今日的情況天淵之別，以往的碎石黃泥路已經鋪得好靚，上落時已不提心吊膽。
因為懶，所以在麥邊落車後便駁綠的，直接入到東壩，需時約25分鐘，車資89元。我知我懶，特別是見到很多人為毅行者練跑，就好鬼內疚，但可以慳了好多時間，加上這段路好鬼悶，所以偷懶一次吧！落了的士，遠眺破邊洲便開行。從東壩往浪茄灣，只需半個鐘，上一段小斜，之後便落斜。在上到斜路尾，有一個觀景台，勿走寶，這裏可以清楚看到浪茄灣及西灣山（上圖），是謀殺菲林的好地方。在浪茄灣有不少人露營，攜幼帶狗（唔知會唔會好似周兆祥隻一樣發軟蹄），浪茄灣清靜沙幼，浪聲隆隆，人聲渺渺，好不舒服。離開浪茄灣，便向今日最難啃的西灣山走。
西灣山難啃之處，在於從沙灘走到314米高的山頂。仰之敬之懼之，不過行山的樂趣，就在愈高風光愈美，況且西灣山不算高，之前從大圍火車站行上針山（532米）都無乜問題，今次理應都可以應付得來，不過十多年前的陰影還在，當時的感覺是山外還有山，沒完沒了的，但今日狀態甚好，山路修得好靚，多了兩個亭供山友休息休息，加上當時不懂看地圖，不知前面還有多少路，負重又勁，反之今日好清楚知道行程，只是有幾段路還是較爛，從浪茄灣到吹筒坳用了個半鐘，無跣腳，無ＰＫ。之後便回西灣亭搭車回西貢，我懶？馬馬虎虎行兩個幾三個鐘當熱身。
這段路雖然不算長，但風光卻一流，浪茄灣之美賽過大浪灣三個灘，另外，要將大浪三灘盡收眼簾，就要上西灣山了。如果只有三個鐘，這條路算是一個好選擇。
