世上無難事，只怕你無心！昨日再去海洋公園，終於見到清醒的樂樂。今次是下午四時半左右，牠剛瞓完午覺，起身叫「侍從」清理寢室後，乖乖在大玻璃前開餐食下午茶（其實是工作人員將竹葉於在玻璃前，引個大帝坐在這個靚位）。至於盈盈，因為要做檢查，並沒有出現。以現在的進度，每次見一隻，下周再去，應該會見齊咁多隻清清醒醒的熊貓。
其實三時半左右已到了熊貓館，當時樂樂還是搵緊周公。到約四時廿分，忽然見到牠反轉身，以為終於清醒了，但我只對了一半。原來牠不過是將個屁股移出張床，然後條尾上下擺動，大約三、四次左右，一舊舊新鮮的米田共便跌落地下。連大便都如此懶，攞命！（後記：有投訴看不清楚舊米田共，卜主當然從善如流，執執張相，放大、減慢跳速再加紅圈，今次清楚嘛。）
其實這張相已經不算核突，安安昨日令全場嘩然，皆因牠站在「山頂」，屁股對著觀眾，表演「山洪暴發」，一大灘米田共洶湧而出，嚇死人！我影完相後，為免影響食自助餐的食慾，都不敢翻看。你有冇興趣睇？想清楚，睇完嘔後果自負。
至於老人家佳佳，昨日大致上還是清醒的，不過還是睡的時間較多。老實講，如果你是牠，唔係行行企企，又有乜嘢好做呀？
