彳 山 亍 水

昨日大暑，東涌回來，混身發臭，不想呆在街，一於返家煮飯。

大暑天，胃口減，應節煲冬瓜湯，先在藥房執劑去濕茶，再在街市買冬瓜，昨日加送一塊鮮荷葉。將去濕茶的藥材洗一洗，煲半個鐘，冬瓜最好買冬瓜頭，據聞特別甜，將皮洗乾淨，切件連皮再煲大半個鐘，當湯飲的可加少許豬肉，若是當水飲可加冰糖，放入雪櫃收工後一碗就最正！

昨天亦是日本的土用丑の日，日本人會在當日食鰻魚，據聞可以消暑喎！自從孔雀石綠事件後，鰻魚消失了一段日子，慶幸超市近來逐步再有得賣，但價錢就好犀利，西田講是日本空運抵港，一條85大元；City Super就是從台灣或日本入口，大中細三款，分別是70、60及50元；百佳都有，亦是最平，42元。

鰻魚拌飯已經是美食，但我最愛撈豆腐（上圖），煮法好簡單：
．豆腐切件用熱水川燙，瀝乾待用，豆腐即使爛了也毋須擔心，因它遲早「散」。豆腐一件已足夠。
．鰻魚切半，後半部切粒，前半部切塊。這非硬性規定，只是貪前半部切塊靚一點。
．兩隻蛋打發調味，若有Cream可加少許，令蛋漿更滑。
．將豆腐鰻魚粒放內蛋漿撈勻後置入盛皿，盛皿可先用牛油抹。
．焗爐預熱十分鐘，放入豆腐鰻魚蛋漿，在180度焗15分鐘，取出用牙籤刺一刺，讓少許蛋漿流出，放上剩下的鰻魚塊，再焗三分左右。
．大功告成，裝飯。