英格蘭無霸氣

英格蘭在世界盃首場雖旗開得勝，但贏得無霸氣。

四分鐘左右已經入波（上圖，法新社），雖是老烏都係入波，之後十五分鐘趁巴拉圭心慌慌，狂攻一輪，可惜無法擴大紀錄。上半場大部分時間都可以壓住對手，後防無乜錯漏，鑽石中場保持壓迫力，遺憾兩個前鋒把握差，奧雲狀態普通，高治勤就勤力，做了好多二傳，但欠缺自己衝鋒陷陣（他在球會都唔會咁做，應該說從來都唔係這類型），加上有太多小動作，食了一面黃牌，對球隊貢獻唔多。下半場形勢無大變化，雖偶有攻勢，但始終無法變為入球。

英格蘭在無朗尼（Wayne Rooney）的情況，沿用上場友誼大勝的高矮前鋒組合殺敵，今日無法見效，中場用鑽石型，Lampard打OMF，而Joe Cole及碧咸分打左右，將謝拉特移後打DMF，除了幾記遠射外，Lampard真的無影；雖然入球是來自碧咸的罰球，他亦好努力滿場飛，但分波策劃工作不多；Joe Cole打得最好，落底或扭入中路，製造了不少險象；謝拉特打DMF，唉！真浪費。後來Downing代奧雲，打四五一，在左路發難，速度高，假以時日應有作為。而Hargreaves代了Joe Cole，加強中場掃蕩，無驚無險，贏了第一場。

今場贏波，除了多得老烏外，還要感謝巴拉圭進攻弱，英格蘭控球時間雖較多，但始終無自己入球。如果前鋒狀差，可試用四五一，將Lampard及謝拉特推前打OMF，Hargreaves打DMF，Joe Cole及碧咸位置不變，前面齋用朗尼或奧雲，多用小組及遠射，或會有奇效。

收費台的講波佬同我一樣都係英格蘭躉，不停吹噓英格蘭有王者之風，頭十五分鐘就有，之後不過是中規中舉。如果之後瑞典贏多過一位，之後與英格蘭一樣兩勝一和，以得失球力壓以首名出線，這時英格蘭十六強便會對Ａ組首名，好大成數會是英德大戰，以今日的表現，勝數真的不多。