澳門三日遊

早前放三日例假,剛領回「大陸身份證」──回鄉卡,本想到朋友介紹、一間位於大梅沙的酒店住一住,但擔心無嘢玩,故改變行程,又到澳門也!

最初計畫住凱悅酒店,貪其泳池靚,點知Full House,惟有第一晚住隔離的新世紀。對上一次住新世紀已是五年前,感覺真的麻麻,知道它大裝修,雖然有人話靚咗,但個賭場(即希臘神話賭場)亦大咗,所以起初不抱大太期望。攞房時櫃台問介唔介意住尾房,我們無乜所謂,只要不是吸煙層就可以(當然要Double Bed,唔要Twin Bed),入到房那一刻「嘩」了一聲,好鬼正呀!兩塊超級落地大玻璃,King Size大床,那一晚攤在床上看煙花(剛好碰到澳門國際煙花比賽),此情此刻,畢生難忘!

第二晚搬到凱悅住,可能珠玉在前,雖然名氣凱悅就贏哂,但入房那一刻又是一聲「嘩」,好鬼普通啫!所謂海景房,真的好令人失望。而最最令人失望的是,無得游水,皆因去澳門時三號風球高高掛,所有戶外設施如泳池都要關閉,靚靚的泳池就如此望門興嘆!

新世紀周末價750大元,如要海景加50元,但我們無加都有海景睇,有賺!下次記住01號尾房,不吸煙的只有八及十樓。至於凱悅,閒日價650元,海景要加200元,唔多抵!周末價仲犀利,動輒過千。

到澳門,老實講,好似無乜好行。對上次算行得最勁,從媽閣廟行上大教堂,再兜兜轉轉,穿街過巷,行上燈塔;去三盞燈、紅街市,踎完大排檔便開始行,逛完消防博物館,路過鏡湖醫院,踱去荷蘭園食雪糕。那次行到腳痛,今次撞正打風,雖然無乜雨,但完全無行街的興致,只是冒雨到媽閣上塔香,再上大教堂看一看罷了。

食已是遊澳門最大的節目,限於二人餐,份量不可以太多,所以大多是淺嘗。西灣安記的豬扒包(議事前廳那一分店比總店的好味)、大三元的金銀丸粥(切記下午是休息的,最好是當消夜,十二點半打烊)、水佬榮的蟹煲(今次第一次食,個煲都算幾好味,但份量太大,兩人吃不消,且環境頗劣,扣分)、坤記的炆牛尾及炸馬介休(不過不失,環境價錢大眾化)、九如坊的木槺蛋糕(雖說製作簡單,但好味就是好味,有得食就最實際),最有驚喜的是一間在九如坊外的葡式食肆,綠色門口,毫不起眼,但它的炸馬介休,真材實料,一條條馬介休絲,好香!那食肆好似叫維記。

有一點遺憾,禮記不見了,整幢樓拆了重建,不知會否原地再開張?另外,紅豆餅亦不見了,去了邊?

Leave a Reply

Your email address will not be published.

This site uses Akismet to reduce spam. Learn how your comment data is processed.