鳳凰聽雨

早兩日例休,與妻到了昂平度宿一宵,本來計劃到鳳凰山看日出,怎知人算不如天算,周六晚周日凌晨連場大雨,令觀日大計無限期押後,快且都要到十一、二月較凍但無雨的季節,正如上兩次上山的日子。

觀日無望又並非昂平之行一無是處。上兩次住昂平都是揀茶園,但不知何故,今次個聯絡電話都是長響唔通,租唔到房。於是今次試一試青年旅舍(圖),價錢就好抵,入住青年旅舍當然要是會員,不過你可以到營舍時才入會,一年會員證承惠一百一十元正,租一間雙人房(獲舍監分了間有雙人床的,另一間雙人房好似是兩張單人床的)僅一百五十元,故度宿一宵僅花二百六十元,較茶園的四百多元平很多,而且妻路過茶園是見它的石屋不甚有好感,故下次多數再揀青年旅舍。如果人多可住其他六人房,每間房有三張碌架床,馬馬虎虎又一晚了。

價錢平,有得自然有失。首先,不知是否舍監覺得天氣不是太熱,故此無在晚上開房的冷氣,妻因此熱到醒咗,其實昂平真的幾涼快,坐在營內的球場納涼,正!但風不入房都無計。其次,不能要求有甚麼電視、卡拉ok等設施,不過我倆就無乜所謂,一個無電視無收音機無噪音的周末,整個營舍除了我倆外,只有三個鬼佬,另有三個青年人在營內紮營,坐在房外的平台黑漆漆一片,只有瀝瀝雨聲,一陣清風送來滔滔樹濤,昂平之行收穫真的不賴!

營舍內有自助餐廳,可供煮食,那三個紮營少年就煮了個番茄薯仔湯伴杯麵,食完更抹乾淨個廚房及掃乾淨個地。我倆就落了大澳逛兼食晚飯(另文詳談),在昂平只是幫襯了豆腐花,每碗八大元,老實講,好普通,都是九龍城的老字號豆腐店的好味!

住昂平除了要留意飲食要自備外,交通都好重要,如果走了尾班車,由東涌搭的士上昂平要一百五十元左右。

Leave a Reply

Your email address will not be published.

This site uses Akismet to reduce spam. Learn how your comment data is processed.