彳 山 亍 水

昨日好忙碌，中午去睇書展，晚上則睇話劇。

已經忘了對上一次幾時睇話劇了（但第一次則好記得，是八二年到中大睇一齣叫《Four Season Man》的話劇），今次睇《東宮西宮》是慕名而去，口碑加時評一致讚好，於是賣票入場，真的大笑連場，拍爛手掌。

你話那一節最精采呢？職業病之故，最鍾意他們「潤」香港傳媒最攞膽，百份報紙一個樣，無報格賴市場，起題全是「轟」、「轟」、「轟」──被轟、捱轟。報紙生果化，已非朝夕，近年雖想糾正，但積習難返。報格這家嘢，忘記吧！以前還是文人辦報，現今嘛，老闆話，編輯要多與Sale Marketing合作。至於起題嘛，嘿嘿！逢屍必艷，逢死必慘，1死178傷就會起近200死傷，咁究竟是1死定199死自己睇全文吧！傳媒怪事，實在難以盡錄，《東宮西宮》亦只是攞一小段來玩，他們主要玩的對象，還是政府，特別是政府的西九龍政策。

進念二十面體玩政府不遺餘力，內裏提出幾個有趣的問題，就是政府與立法會都是水兵對海軍，一個玩官僚，一個為反而反，都是低水準的論政。政策研究，大家欠奉；問題癥結，無人去問，吵吵鬧鬧，又是一天。

《東宮西宮》內的其他精警句，自己入場睇吧！導演賣廣告話仲有票，但齣劇有兩處有驚喜，一是陳浩峰的歌喉及劇中的歌，正！二是講樹的環節，好有感覺。啲起心肝，多點逛街，努力影樹，為這個地方留點印記！

一年容易又書展了。

由香港搞書展開始，我每年都會去，但近幾年都是齋行的多，妻話我似朝聖多個行書展，咁都幾貼切。書是要睇才知是否啱睇，但書展愈來愈多人，根本插釘難入，又怎樣睇書呢！此外，近年發覺書展似散貨場，新書唔係無，只係唔多（又或者是唔多啱睇），折扣嘛！你多逛二樓書店又有會員卡，已經相差不多了。

每年書展都是人龍長長，由地鐵站開始，萬人同向的往會展走，在這剎那，真的以為香港讀書的人多了。