其實睇太平清醮已非第一次，但對上一次已是六年前了。點解有六年無入長洲呢？很簡單，無新意囉！純粹睇飄色實在不夠吸引力，今年肯入長洲，還長達三日，皆因有搶包山。話哂對上一次搶包山都已是廿六年了，加上碰到兩天休假，所以專程入長洲捧場。
話說依傳統搶包山要在凌晨零時正開始，而警方預備在晚上十時半派籌，但擔心有很多同道之人，所以早早食了個晚餐，匆匆沖個涼，八時十分便去排隊，點知人龍已經轉了兩個彎了。無計，惟有企、等、企、等。警方有見及此，提早在九時許派籌，而且還由「三粒花」負責，真是大材小用了。好了，籌在手，分別是二六六、二六七，但仍是要等、企、等、企，直至近十一時才放人入球場。實在唔多明白點解派了籌，人群不可以自由活動，再在指定時間入球場。唉！結果企了兩個半鐘，才可以在球場唞一唞。
可能今年是初次復辦，特別小心，主辦當局不敢放太多人入球場（只派籌一千），結果偌大的球場顯得很自在，入唔到場的街坊等，惟有在球場外圍觀，交遊廣闊的便可上樓，居高臨下觀看賽事。
比賽開始前難免有要人致詞，但他實在太長氣，可能他想將廿六年要講的一次講翻夠本。幸好他有時間限制，準時十一時五十九分收聲，敲鑼比賽。
如果你問搶包山刺激嗎？有點難答，因為全程都是透過相機的eyeviewer看，刺不刺激，真的不知道。但有一件事就好肯定，等了近四個鐘，只為了看三分鐘的搶包山，值唔值呀？請自己衡量吧！
