睇太平清醮，飄色自然是一大主角。
今次早了一日入長洲，晚間四處逛睇有無得意的事或人，好過呆在渡假屋嘛。在途中看到有坊眾準備飄色，大人忙得大汗淋漓，架上的小朋友卻自得其樂。其實飄色這玩意，百分百是島上居民一個獨有的童年記憶，而且要上架的，必須有頑強的鬥志或極大的玩心（唔係點頂得住酷熱的天氣）及不害羞（否則又怎可在眾目睽睽下揮灑自如），上圖的小女孩便是一例。
以前最初睇飄色時都會覺得好有趣，但睇真口的又覺得幾辛苦，偶然一次就無傷大雅。據悉，不是你想上就可以，上架的最高體重是四十磅，超重嗎？對不起，請你先纖一纖體，逾時不候。
今次睇飄色，算是有史以來最舒服的一次了，對上一次企在街上，大汗疊細汗，苦！今次老婆有個同事是長洲原居民，借了她鄰居家，地點一流，就在巡遊途中，可以等到有飄色時才從冷氣間走回酷熱的街上，還有木椅供企高供拍照，正！
